Felags brennistøð fyri alt landiðHugskotið er, at ein nýmótans brennistøð, sum kann framleiða el inn á netið hjá SEV og varma til fjarhitaskipan, kann gagnnýta orkuna í ruskinum nógv betri enn verðandi brennistøðir.
Brennistøðir av hesum slag kunnu úr ruskinum gera 20% um til elorku og 65 % um til varmaorku, meðan bara 15% fara til spillis. Um varmaorkan skal gagnnýtast er neyðugt at gera eitt fjarhitanet svarandi til 2500 hús. Hetta er kostnaðarmikið.
Sum tað sæst í talvuni verður samlaða íløgan í nýggju brennistøðina og fjarhitanetið 450 milliónir krónur.
Men av tí, at brennistøðin bæði kann selja el og varma er íløgan fíggjarliga skilagóð. Við valdu prísum í talvuni er afturgjaldstíðin umleið 15 ár.
Brennistøðin framleiðir javnt gjøgnum árið íalt 20 GWh av elorku. Hetta er umleið 8% av samlaðu elframleiðsluni hjá SEV og líka nógv sum 10 vindmyllur á stødd við tær á Mýrunum framleiða.
Oljunýtsla
Tað er áhugavert at hyggja at sparingini í oljunýtslu, sum ein tílík brennistøð hevur við sær. Í talvuni sæst, at SEV og húsarhald sleppa undan umleið 9000 tonsum av olju um árið.
CO2 útlát
Fyri umhvørvið er fyrimunurin eisini stórur.
Í Kyoto sáttmálanum binda vit okkum til at minka um CO2 útlátið .
Nýggja brennistøðin minkar CO2 útlátið við 25 000 tonsum. Hetta ger góðan mun, tá ið samlaði niðurskurðurin skal verða á leið 150 000 tons.