Erosión í Norðanlondum

Fjøllini nógva staðni í Føroyum bera tekin um jørðildisoyðing, erosión. Hetta kann vera elvt av náttúrligu viðurskiftunum, sum veðurlag og vøkstri. Tað er eisini hugsandi, at ov nógv bit í haganum eigur sín leiklut í erosiónini í Føroyum.





Fyri at greina, hvussu tílíkir spurningar kunnu viðgerast í Føroyum, er bygt upp eitt netverk í Norðanlondum fíggjað av Nordisk Ministerråd, har føroysku luttakararnir saman við starvsfeløgum í grannalondunum hava lýst erosiónsviðurskiftini í Grønlandi, Íslandi, Føroyum, Noregi, Svøríki og Finlandi. Í løtuni verður arbeitt við at prenta ein bókling um erosión í hesum økjunum.

Bókin og millumlandasamstarvið gevur grundarlag fyri at fara víðari til kanningar av erosiónsviðurskiftum í Føroyum. Sum partur av verkætlanini eru samanlagt fýra smá øki í Føroyum innhegnaði. Trý av teimum røkka frá Signabø til ovast á Sornfelli, meðan tað fjórða stykkið er á Sandoynni vestanfyri Gróthúsvatn. Á teim innhegnaðu økjunum ber til at fylgja við, hvussu vøkstur tekur seg upp, tá eingin seyður sleppur framat.